Një ngjarje e rëndë ka tronditur Italinë, ku një 58-vjeçar është arrestuar nga autoritetet me dyshimin se ka vrarë nënën e tij 86-vjeçare dhe më pas ka fshehur trupin e saj.
Sipas mediave italiane, ngjarja ka ndodhur në zonën pranë Palazzina di Caccia, në Torino, ku trupi i të moshuarës u gjet i varrosur në një pyll. 86-vjeçarja ishte shpallur e zhdukur prej rreth një muaji. Denoncimi për zhdukjen e saj u bë nga një e njohur, e cila kishte humbur kontaktet me të dhe u alarmua nga mungesa e komunikimit.
Pas nisjes së hetimeve, policia italiane mori në pyetje djalin e saj, i cili fillimisht deklaroi se e ëma kishte ndërruar jetë për shkaqe natyrale dhe se ai e kishte varrosur trupin. Megjithatë, gjatë marrjes në pyetje, 58-vjeçari ndryshoi dëshminë dhe pranoi se e kishte vrarë të ëmën.
Sipas deklarimeve të tij, motivi i krimit lidhej me frikën se do të humbiste pensionin e së moshuarës, i cili, sipas tij, përbënte burimin e vetëm të të ardhurave.
Autoritetet vijojnë hetimet për të zbardhur plotësisht rrethanat dhe motivet e ngjarjes, ndërsa autopsia pritet të përcaktojë shkakun e saktë të vdekjes së 86-vjeçares.
