Presidentja e Kosovës, Vjosa Osmani, ka nënshkruar pjesëmarrjen e Kosovës në Bordin e Paqes të presidentit amerikan Donald Trump, gjatë një ceremonie të mbajtur të enjten në Davos, Zvicër.
Para nënshkrimit, Osmani i ka zgjatur dorën Trumpit dhe kanë shkëmbyer disa fjalë për pak sekonda, në një moment të shkurtër simbolik gjatë ceremonisë.
Kosova është një nga 19 shtetet që kanë firmosur në ditën e themelimit të këtij Bordi. Krahas saj, nënshkrimin e kanë dhënë edhe Argjentina, Armenia, Bullgaria, Bahrejni, Azerbajxhani, Hungaria, Indonezia, Jordania, Kazakistani, Katari, Maroku, Pakistani, Paraguai, Arabia Saudite, Turqia, Emiratet e Bashkuara Arabe, Uzbekistani dhe Mongolia.
Bordi i Paqes i shpallur nga Trump synon të krijojë një platformë të re ndërkombëtare për ndërmjetësim dhe adresim të konflikteve globale, ndërsa përfshirja e Kosovës shënon një hap të ri në angazhimin e saj diplomatik në iniciativa ndërkombëtare.
