Benedetto Santapaola, i njohur si “Nitto”, një nga figurat historike të mafias së Katanias, ka ndërruar jetë në moshën 87-vjeçare. Ai ndodhej prej majit 1993 nën regjimin e ashpër të izolimit 41-bis dhe ishte i burgosur në burgun e Operas. Ditët e fundit i kaloi në repartin penitenciar të spitalit San Paolo në Milano, ku ishte transferuar nga qelia.
Prej 33 vitesh në burg, Santapaola nuk foli asnjëherë për sekretet që mbante: për perandorinë e tij ekonomike dhe, mbi të gjitha, për lidhjet me figura të pushtetshme e të “paprekshme” në Katania dhe në gjithë Sicilinë. I dënuar me 18 burgime të përjetshme, ai vazhdoi të paraqitej si “viktimë e të penduarve”, siç deklaroi dikur në një proces gjyqësor.
I njohur si “gjuetari”, në vitet ’70 dhe ’80 ishte njëkohësisht i përgjakshëm dhe sipërmarrës i suksesshëm. Në vitin 1978, zyrtarisht ishte pronar i një autosalloni të njohur në Katania, ku në inaugurim morën pjesë figura të larta të qytetit, përfshirë prefektin, kryepolicin dhe arqipeshkvin. Në realitet, ai kishte krijuar tashmë lidhje me korleonezët, që do të merrnin kontrollin e Cosa Nostra-s.
Gazetari Giuseppe Fava ishte ndër të parët që denoncoi publikisht lidhjet dhe sistemin e pushtetit që rrotullohej rreth Santapaolës. Ai u vra në vitin 1984, një atentat i porositur nga vetë bosi, sipas hetimeve.
Santapaola u dënua si një nga urdhëruesit e masakrës së Kapacit dhe asaj të Via D’Amelio. Ai kishte kërkuar nga Totò Riina vrasjen e rivalit Alfio Ferlito; në atentatin e 16 qershorit 1982 u vranë edhe tre karabinierë dhe një shofer i ri që po e transportonin të burgosurin.
Pas 11 vitesh në arrati, ai u arrestua në vitin 1993 në një fermë pranë Katanias. Që prej asaj dite zgjodhi heshtjen, pa bashkëpunuar kurrë me drejtësinë. Edhe pas burgosjes, rrjeti i tij familjar dhe ekonomik në Katania vijoi të ishte aktiv, sipas hetimeve të antimafias.
“Sekretet e atij sistemi pushteti, të përkryer dhe të turpshëm, Santapaola i mori me vete në varr”, ka deklaruar Claudio Fava, djali i gazetarit të vrarë.
Hetimet mbi lidhjet dhe ndikimin e tij vazhdojnë ende nga prokuroria antimafia e Katanias.
