Në një seancë të tensionuar dëgjimore në Senatin amerikan, sekretari i Shëndetësisë, Robert Kennedy Junior, mbrojti pikëpamjet e tij rreth vaksinave, pandemisë së Covid-19 dhe çështjeve të tjera të ndjeshme që kanë qenë në qendër të debatit politik në Shtetet e Bashkuara, sidomos pas rikthimit të Donald Trump në pushtet. Seanca dëgjimore, e cila zgjati rreth tre orë, u zhvillua një javë pasi Kennedy shkarkoi kreun e Qendrave për Kontrollin dhe Parandalimin e Sëmundjeve (CDC), pas një përplasjeje mbi politikat e tij të vaksinimit. Ky veprim i Kennedy-t shkaktoi polemika të mëdha, duke ndezur edhe më tej tensionet politike mbi çështjen e shëndetit publik.
Demokratët e ashpër ndaj Kennedy-t
Demokratët e akuzuan sekretarin e Shëndetësisë se ka dezinformuar amerikanët, ka gënjyer mbi efektivitetin e vaksinave dhe ka kufizuar qasjen e qytetarëve tek to. Disa prej tyre përdorën një gjuhë tepër të fortë, duke e quajtur atë “sharlatan” dhe madje i kërkuan të dorëhiqet.
Ligjvënësit e pyetën vazhdimisht mbi qëndrimin e tij për vaksinën kundër Covid-19, duke theksuar se vaksinat kanë shpëtuar miliona jetë gjatë pandemisë. Ata e pyetën nëse ai pranon faktin që mbi 1 milion amerikanë humbën jetën nga koronavirusi. Kennedy u përgjigj se nuk i di shifrat e sakta, duke fajësuar “kaosin e të dhënave” gjatë administratës së Joe Biden.
Republikanët, të përçarë në qëndrime
Republikanët e përdorën një ton më të matur, por disa shprehën gjithashtu shqetësime. Senatori Bill Cassidy, i cili është edhe mjek dhe që dha një votë kyçe për ta konfirmuar Kennedy-n në post, u tregua më i ashpër ndaj tij, duke e akuzuar se ka kufizuar qasjen në vaksina për kategori të caktuara të popullsisë.
Nën udhëheqjen e Kennedy-t, Administrata Amerikane e Ushqimit dhe Barnave (FDA) miratoi së fundmi një raund të ri vaksinash përforcuese kundër Covid-19, por vetëm për grupe më të kufizuara: të rriturit mbi 65 vjeç dhe personat me probleme shëndetësore serioze. Ky vendim shkaktoi reagime të ashpra nga ekspertët dhe ligjvënësit, të cilët e konsideruan një hap prapa në luftën kundër pandemive.
Vaksinat e tjera dhe fruthi
Senatorët vunë në dukje se Kennedy ka bërë deklarata kontradiktore lidhur me vaksinat në përgjithësi, përfshirë edhe imunizimin kundër fruthit. SHBA këtë vit është përballur me përhapjen më të rëndë të fruthit në dekada. Ndërsa Kennedy publikisht ka mbështetur vaksinimin si mënyrën më të mirë për të parandaluar përhapjen e kësaj sëmundjeje, ai gjithashtu ka përsëritur pretendime të rreme për sigurinë dhe efikasitetin e saj. Po të njëjtën gjë ka bërë edhe për vaksinat anti-Covid dhe ato që përdorin teknologjinë mRNA, duke ngritur dyshime mbi sigurinë e tyre.
Dyshime edhe për pilulën e abortit
Gjatë seancës, Kennedy shprehu gjithashtu rezerva dhe dyshime rreth sigurisë së pilulës së abortit, duke e bërë edhe më të ashpër debatin mes tij dhe demokratëve.
Seanca dëgjimore tregoi thellimin e ndasive politike në SHBA rreth çështjeve të shëndetit publik dhe vaksinimit, me demokratët që e akuzojnë Kennedy-n për dezinformim të rrezikshëm dhe me disa republikanë që gjithashtu po distancohen nga qasjet e tij.
