Udhëheqësi suprem i Iranit, Ajatollah Ali Khamenei, ka akuzuar Shtetet e Bashkuara dhe presidentin amerikan Donald Trump se janë përgjegjës për “viktimat, dëmet dhe shpifjet” gjatë protestave të fundit në vend. Në një fjalim të mbajtur të shtunën, Khamenei pranoi se mijëra persona janë vrarë gjatë trazirave, disa prej tyre “në mënyrë çnjerëzore dhe barbare”, por i atribuoi vdekjet asaj që e quajti veprimtari e “nxitësve të trazirave”.
Protestat në Iran kanë shkaktuar, sipas Agjencisë së Aktivistëve për të Drejtat e Njeriut në Iran (HRANA), 3,090 viktima që nga 28 dhjetori, kur shpërthyen fillimisht për shkak të situatës ekonomike dhe më pas u shndërruan në thirrje për fundin e sundimit të udhëheqësit suprem. Qeveria iraniane i ka cilësuar demonstratat si “trazira” të mbështetura nga armiqtë e vendit.
Forcat e sigurisë kanë reaguar me dhunë ndaj protestuesve, ndërsa video që tregojnë të shtëna ndaj turmave janë verifikuar nga BBC Persian dhe BBC Verify. Ndërkohë, Irani ka vendosur një bllokim pothuajse total të internetit dhe shërbimeve të komunikimit, me nivelin e lidhjes që ka rënë në rreth 2% të normales, sipas NetBlocks.
Nga ana e tij, presidenti amerikan Donald Trump u ka bërë thirrje protestuesve iranianë të “vazhdojnë protestat” dhe ka kërcënuar me ndërhyrje ushtarake nëse forcat e sigurisë vazhdojnë vrasjet. Departamenti amerikan i Shtetit deklaroi se ka informacione se Irani po shqyrton mundësinë e sulmeve ndaj bazave amerikane, duke paralajmëruar se një veprim i tillë do të përballej me “një forcë shumë, shumë të fuqishme”.
Trump ka thënë se i është raportuar se “vrasjet në Iran kanë ndalur”, por nuk ka përjashtuar ndërhyrjen ushtarake. Deklaratat e tij vijnë në një kohë kur SHBA-ja dhe Britania e Madhe kanë reduktuar praninë e personelit në bazën ajrore Al-Udeid në Katar, si masë paraprake sigurie.
