Mbrojtja ajrore e Kuvajtit rrëzoi gabimisht tre avionë luftarakë amerikanë F-15 gjatë luftimeve aktive të hënën, njoftoi U.S. Central Command (CENTCOM), duke e cilësuar incidentin si një rast të dukshëm “zjarri mik” në kuadër të konfliktit me Iranin.
Sipas CENTCOM, të gjashtë anëtarët e ekuipazheve u katapultuan në mënyrë të sigurt, u rikuperuan dhe ndodhen në gjendje të qëndrueshme shëndetësore.
“Gjatë luftimeve aktive – që përfshinin sulme nga avionë iranianë, raketa balistike dhe dronë – avionët luftarakë të Forcave Ajrore të SHBA-së u rrëzuan gabimisht nga mbrojtja ajrore kuvajtiane,” thuhet në deklaratë. Autoritetet e Kuvajtit e kanë pranuar incidentin dhe një hetim për shkaqet është në zhvillim.
Pamje video të verifikuara nga Reuters tregojnë një avion ushtarak amerikan duke rënë në flakë mbi zonën Al Jahra, ndërsa një person shihet duke zbritur me parashutë.
Ky është rrëzimi i parë i avionëve amerikanë që nga nisja e luftës SHBA-Izrael kundër Iranit të shtunën dhe nënvizon përshkallëzimin e shpejtë të konfliktit në rajonin e Gjirit.
Tym pranë ambasadës amerikane
Në një incident të veçantë, dëshmitarë raportuan tym pranë kompleksit të ambasadës amerikane në Kuwait City, ku u panë automjete zjarrfikëse dhe ambulanca. Nuk pati reagim të menjëhershëm nga ambasada e SHBA-së apo nga Departamenti amerikan i Shtetit lidhur me këtë ngjarje.
Kuvajti bëri të ditur se kishte interceptuar dronë armiqësorë më herët gjatë ditës, në ditën e tretë radhazi të sulmeve hakmarrëse iraniane ndaj shteteve të Gjirit, në përgjigje të goditjeve amerikane dhe izraelite kundër Republikës Islamike.
Media shtetërore iraniane, duke cituar Islamic Revolutionary Guard Corps, raportoi më herët se forcat e armatosura iraniane kishin goditur një avion amerikan që më pas u rrëzua në Kuvajt.
Ndërkohë, një sondazh i publikuar nga Reuters/Ipsos gjatë fundjavës tregon se vetëm një në katër amerikanë mbështet sulmet e SHBA-së ndaj Iranit, me shqetësime të shtuara për sigurinë e trupave amerikane. Presidenti Donald Trump paralajmëroi të dielën për mundësinë e viktimave të tjera amerikane teksa operacionet ushtarake vijojnë.
