Zyrtarë të lartë nga Turqi, Egjipti dhe Pakistan zhvilluan bisedime të ndara me të dërguarin amerikan Steve Witkoff dhe ministrin e jashtëm iranian Abbas Araghchi gjatë dy ditëve të fundit, në përpjekje për të ulur tensionet mes SHBA-së dhe Iranit, sipas gazetarit të Axios, Barak Ravid, në platformën X.
“Ndërmjetësimi po vazhdon dhe po bën përparim. Diskutimet kanë të bëjnë me përfundimin e luftës dhe zgjidhjen e të gjitha çështjeve të pazgjidhura. Shpresojmë të kemi përgjigje së shpejti”, tha Ravid duke cituar një burim të njohur me çështjen.
Megjithatë, nuk ka ende qartësi mbi fazën e negociatave për të arritur atë që ish-presidenti Donald Trump e quajti një “zgjidhje e plotë dhe totale” e konfliktit. Sipas raportimeve, Irani ka mohuar çdo komunikim të drejtpërdrejtë apo të tërthortë me SHBA-në.
Në të njëjtën kohë, Trump deklaroi për Fox Business se bisedimet me Iranin u zhvilluan të dielën në mbrëmje me të dërguarit amerikanë Steve Witkoff dhe Jared Kushner. Negociatat e ndërmjetësuara nga vendet e tjera kanë për qëllim të shmangin përshkallëzimin e mëtejshëm të tensioneve dhe të gjejnë rrugë për zgjidhje diplomatike.
