Autoritetet turke kanë arrestuar kryetarin e bashkisë së Beyoglu-t në Stamboll, Inan Guney, së bashku me rreth 40 zyrtarë të tjerë lokalë, në kuadër të një hetimi për korrupsion. Mediat raportojnë se mes të ndaluarve janë edhe këshilltarë dhe truproja e tij.
Guney është pjesë e Partisë Popullore Republikane (CHP), partia më e madhe opozitare në vend. Arrestimi i tij vjen pas një sërë veprimesh të ngjashme ndaj drejtuesve të tjerë të kësaj partie, përfshirë edhe kryebashkiakun e Stambollit, Ekrem Imamoglu, i cili u arrestua në mars dhe shihet si kundërshtari kryesor i presidentit Erdogan për zgjedhjet presidenciale të vitit 2028.
Valët e arrestimeve kanë ngritur dyshime mes komunitetit ndërkombëtar për përdorimin e drejtësisë si mjet presioni politik ndaj opozitës në Turqi.
