Presidenti amerikan Donald Trump i ka dhënë Hamasit një afat prej “tre deri në katër ditë” për t’u përgjigjur ndaj planit të tij të paqes me 20 pika për Gazën. “Do të jetë një fund shumë i trishtë” nëse Hamas e refuzon marrëveshjen, tha Trump për gazetarët jashtë Shtëpisë së Bardhë.
Plani përfshin ndalimin e luftimeve, kthimin e pengjeve izraelite dhe krijimin e një “Bordi të Paqes” ndërkombëtar për administrimin e Gazës, ku do të bënte pjesë edhe ish-kryeministri britanik Tony Blair. Sipas një reagimi nga ministria e Jashtme e Katarit, Hamasi po e shqyrton me “përgjegjshmëri” propozimin e Shtëpisë së Bardhë.
Dokumenti parashikon gjithashtu një “rrugë të besueshme drejt vetëvendosjes dhe shtetësisë palestineze” nëse plotësohen kushtet, por kryeministri izraelit Benjamin Netanyahu ka theksuar se Izraeli do ta “kundërshtojë me forcë” këtë ide.
Trump – i cili shpalli planin përkrah Netanyahut – paralajmëroi se nëse Hamasi nuk e pranon, i jep Izraelit “mbështetje të plotë për të bërë atë që duhet bërë”.
