Presidenti amerikan Donald Trump deklaroi se do t’i kërkojë agjencive federale amerikane, përfshirë këtu Departamentin e Mbrojtjes, që të nisin “procesin e identifikimit dhe publikimit” të dosjeve qeveritare të cilat lidhen me jetën jashtëtokësore.
Trump e bëri njoftimin përmes platformës së tij Truth Social, pasi kishte akuzuar më parë ish-presidentin Barack Obama për nxjerrjen e informacioneve të klasifikuara, duke iu referuar podcastit të javës së kaluar ku paraardhësi i tij qe shprehur se “alienët ekzistojnë”.
“Ai nuk duhet ta bënte. Ish-presidenti ka bërë një gabim të madh”.
I pyetur nëse edhe ai vetë beson në ekzistencën e alienëve, Trump u përgjigj: “Nuk e di nëse janë realë apo jo”. Obama kishte pohuar për podkasterin Brian Tyler Cohen në një intervistë të publikuar të shtunën se mendon se alienët ekzistojnë.
“Ata janë realë, por unë nuk i kam parë dhe nuk mbahen në Zonën 51,” u shpreh ai me tone ironike, duke shtuar se “nuk ka ndonjë strukturë nëntokësore, përveç nëse ekziston një komplot i madh i cili t`i jetë mbajtur i fshehtë presidentit të Shteteve të Bashkuara.”
Ka pasur një rritje të ndjeshme të interesit publik për UFO-t në SHBA këto vitet e fundit, e nxitur sidomos në 2017-tën nga raportimet mbi një program sekret të Pentagonit që hetonte dëshmitë e pilotëve dhe anëtarëve të tjerë të ushtrisë amerikane, të cilët pretendonin se kishin parë objekte të çuditshme në ajër.
