Presidenti amerikan Donald Trump ka urdhëruar dislokimin e trupave federale në Portland, Oregon, duke autorizuar përdorimin e “forcës së plotë” nëse është e nevojshme, me qëllim shtypjen e protestave kundër qendrave të paraburgimit të emigrantëve.
“Kam urdhëruar Sekretarin e Luftës, Pete Hegseth, të sigurojë të gjitha forcat e nevojshme për të mbrojtur Portlandin e shkatërruar nga lufta,” deklaroi Trump në rrjetin Truth Social, duke shtuar se masa synon mbrojtjen e objekteve të ICE që “janë nën sulm nga Antifa dhe terroristë të tjerë të brendshëm”.
Njoftimi ka ngjallur reagime të ashpra nga zyrtarët demokratë, të cilët e kanë cilësuar vendimin si abuzim me pushtetin.
“Nuk ka asnjë kërcënim ndaj sigurisë kombëtare në Portland. Komunitetet tona janë të qeta,” tha guvernatorja e Oregonit, Tina Kotek. Ajo njoftoi se është duke u konsultuar me Prokurorin e Përgjithshëm të shtetit për hapat ligjorë që mund të ndërmerren. “Do të jemi të përgatitur të reagojmë nëse duhet,” shtoi ajo.
Pentagoni deklaroi se është i gatshëm të mobilizojë personel ushtarak në mbështetje të Departamentit të Sigurisë Kombëtare (DHS), por mbetet e paqartë nëse Trump do të aktivizojë Gardën Kombëtare apo ushtrinë e rregullt. Nuk është sqaruar as çfarë përfshin konkretisht urdhri për “përdorim të forcës së plotë”.
Qendra e Përpunimit të ICE në Portland ka qenë objekt protestash që prej fillimit të muajit qershor, shpeshherë të shoqëruara me përplasje. Sipas Prokurorisë Federale, deri më 8 shtator janë ngritur akuza ndaj 26 personave për vepra si zjarrvënie dhe sulm ndaj oficerëve.
DHS pretendon se demonstruesit kanë “rrethuar dhe sulmuar vazhdimisht” godinën e ICE. Në rrjetin X, departamenti akuzoi grupin Rose City Antifa – të sapo shpallur nga Trump si organizatë terroriste – për publikimin e adresave të oficerëve dhe dërgimin e kërcënimeve me vdekje.
Megjithatë, ekspertët ligjorë theksojnë se ligji amerikan nuk parashikon një mekanizëm zyrtar për shpalljen e një grupi si organizatë terroriste të brendshme, çfarë mund të përbëjë shkelje të Amendamentit të Parë të Kushtetutës.
Senatori Ron Wyden paralajmëroi se mund të përsëritet “skenari i vitit 2020”, kur trupat federale u përdorën për të shtypur protestat pas vrasjes së George Floyd. Ai u bëri thirrje qytetarëve të mos bien pre e “përpjekjeve të Trump për të nxitur dhunë”.
Ligjvënës të tjerë demokratë akuzuan ICE për arrestime të padrejta, duke sjellë shembuj si ndalimi i një babai para çerdhes së fëmijës dhe arrestimi i një zjarrfikësi vullnetar gjatë shuarjes së zjarreve.
Megjithatë, disa zyrtarë republikanë e përshëndetën vendimin. Ish-kongresistja Lori Chavez-DeRemer e quajti Portlandin “zonë lufte të mbërthyer nga ligësia” dhe falënderoi Trump “që po mbron objektet e ICE”.
Më herët gjatë vitit, Trump ka dërguar Gardën Kombëtare edhe në Los Anxhelos dhe Uashington DC për të përballuar trazirat lidhur me emigracionin. Një gjykatë federale në Kaliforni e shpalli ndërhyrjen në Los Anxhelos të paligjshme, duke konstatuar shkelje të Aktit Posse Comitatus, i cili kufizon përdorimin e ushtrisë për çështje të brendshme.
Rrjedhimisht, mbetet e paqartë nëse presidenti ka bazë ligjore për dislokimin e forcave federale në Oregon.
