Presidenti i Shteteve të Bashkuara, Donald Trump, ka deklaruar se një takim midis presidentit rus Vladimir Putin dhe presidentit ukrainas Volodymyr Zelensky është i mundur, por “shumë i vështirë” për t’u realizuar, pasi sipas tij, “ata e urrejnë njëri-tjetrin”.
Duke folur të dielën para gazetarëve gjatë një vizite në memorialin e aktivistit të vrarë Charlie Kirk, Trump u shpreh se do të ishte i gatshëm të “ndërhynte” për të afruar dy udhëheqësit dhe se mund të fliste veçmas me secilin prej tyre. “Do ta zgjidhim në një mënyrë ose në një tjetër. Kështu që do të duhet të përfshihem”, tha presidenti amerikan. Ai kujtoi gjithashtu se muajin e kaluar ishte takuar me Putinin në një samit të zhvilluar në Alaska, pas të cilit premtoi se do të përgatiste terrenin për një takim mes liderit rus dhe atij ukrainas. Trump theksoi se tensionet mes dy vendeve janë shumë të thella. “Urrejtja mes Putinit dhe Zelenskyt është e paimagjinueshme”, tha ai, duke shtuar se mendonte se konflikti në Ukrainë do të ishte “i lehtë për t’u zgjidhur”, por që në realitet është treguar më i ndërlikuar. Presidenti amerikan pretendoi gjithashtu se gjatë mandatit të tij ka “ndaluar shtatë luftëra”.
Nga ana tjetër, ndonëse nuk është konfirmuar asnjë takim i afërt mes Putinit dhe Zelenskyt, Trump la të kuptohej se bisedimet mund të zhvillohen “relativisht shpejt”, pa dhënë detaje mbi formatin apo vendin e mundshëm. Presidenti rus Vladimir Putin ka deklaruar më herët se është “gati në parim” të takohet me homologun ukrainas, duke sugjeruar që Zelensky mund të udhëtojë në Moskë për negociata. Megjithatë, Kievi e ka hedhur poshtë këtë ide, duke theksuar se nuk do të pranojë “propozime qëllimisht të papranueshme”. Putin ka nënvizuar gjithashtu se arritja e marrëveshjeve mbi çështjet kryesore mes dy vendeve do të ishte “praktikisht e pamundur”, duke përmendur jo vetëm vullnetin politik, por edhe “vështirësitë ligjore dhe teknike” që lidhen me mosmarrëveshjet territoriale.
Kështu, ndërsa perspektiva e një takimi mes dy liderëve mbetet e pasigurt, roli i Trump-it si ndërmjetës është vendosur sërish në qendër të vëmendjes ndërkombëtare.
