Pas Groenlandia-s, një tjetër ishull duket se ka hyrë në objektivat e Donald Trump-it, këtë herë në Detin e Karaibeve: presidenti amerikan ka njoftuar se po shqyrton mundësinë e një “blerjeje miqësore” të Kuba-s. Me Havanën tensionet mbeten shumë të larta pas incidentit të ndërhyrjes ndaj një mjeti civil lundrues amerikan, të ndaluar të mërkurën nga autoritetet kubane – episodi i fundit i një përplasjeje të pafund që, mes embargos dhe sanksioneve, “po e shtyn ishullin drejt kolapsit”, sipas denoncimit më të fundit të OKB-së.
“Qeveria kubane po flet me ne dhe, siç e dini, ka probleme shumë të mëdha. Nuk ka para, aktualisht nuk ka asgjë, por po komunikon me ne dhe ndoshta do të shohim një blerje miqësore të Kubës”, u tha manjati gazetarëve teksa largohej nga Shtëpia e Bardhë për një udhëtim në Teksas.
Udhëheqësi amerikan nuk dha detaje të tjera mbi atë që po paraqitet si një tjetër front i doktrinës së tij agresive në politikën e jashtme. Se SHBA-ja dhe Kuba kanë qenë në diskutime është pohuar disa herë ditët e fundit nga media si Axios, e cila javën e kaluar raportoi për kontakte sekrete mes Marco Rubio dhe Raul Guillermo Rodriguez Castro, nip dhe kujdestar i ish-udhëheqësit të ishullit, Raúl Castro.
Rodriguez Castro nuk është pjesë e qeverisë, por konsiderohet një figurë me ndikim në ishull. Sipas Axios, kontaktet kanë shërbyer për të anashkaluar kanalet zyrtare kubane për ato që “nuk do t’i quaja aq shumë ‘negociata’, sesa ‘diskutime’ për të ardhmen”, siç është shprehur një zyrtar i lartë i administratës Trump.
Kontaktet u mohuan menjëherë nga Havana, por për të ushqyer më tej zërat këtë javë kontribuoi Miami Herald, sipas të cilit zyrtarë amerikanë pranë Sekretarit të Shtetit u takuan të mërkurën me Rodríguez Castro në kuadër të samitit të CARICOM në arkipelagun e Saint Kitts dhe Nevis, ku mori pjesë edhe vetë Rubio. Pikërisht gjatë këtij samiti, Rubio deklaroi se Kuba duhet “të ndryshojë rrënjësisht”. Fjalët e fundit të Trump duket se tregojnë se Uashingtoni po punon aktivisht drejt këtij objektivi.
