Presidenti i SHBA-së, Donald Trump, shënoi një vit nga rikthimi i tij në Shtëpinë e Bardhë, duke u fokusuar kryesisht në politikat e emigracionit, të cilat i cilësoi si një nga arritjet kryesore të mandatit të tij të dytë.
Gjatë një konference për shtyp, Trump deklaroi se Zyra e Imigracionit dhe Doganave (ICE) ka arrestuar rreth 10 mijë persona pa dokumente në Minesota, të cilët ai i përshkroi si “kriminelë dhe emigrantë ilegalë”. Presidenti shfaqi edhe fotografi të personave të ndaluar, si dëshmi të përforcimit të zbatimit të ligjit.
Në fjalimin e tij, Trump theksoi gjithashtu mbështetjen që, sipas tij, gëzon nga komuniteti hispanik, duke vlerësuar kontributin e tyre ekonomik. Ai preku shkurtimisht çështje të politikës së jashtme, përfshirë Venezuelën, si dhe konfirmoi pjesëmarrjen në Forumin Ekonomik Botëror në Davos.
Në aspektin ekonomik, presidenti e cilësoi ekonominë amerikane si më të fuqishmen në botë, ndërsa pranoi se administrata e tij përballet me kritika për rritjen e kostos së jetesës. Në përfundim, Trump u shpreh se administrata e tij do të vijojë politikat e emigracionit dhe tregtisë edhe në vitet në vijim.
