Presidenti amerikan Donald Trump deklaroi se Shtetet e Bashkuara janë duke zhvilluar negociata me Iranin për një marrëveshje të mundshme, duke theksuar se në këto bisedime janë përfshirë edhe sekretari i Shtetit Marco Rubio dhe nënpresidenti JD Vance.
“Po negociojmë me Iranin. Në këto bisedime janë përfshirë, ndër të tjerë, edhe sekretari i Shtetit Marco Rubio dhe nënpresidenti JD Vance. Irani dëshiron një marrëveshje”, tha Trump.
Ai shtoi se bisedimet po zhvillohen me “njerëzit e duhur” dhe se Teherani është shumë i interesuar për arritjen e një marrëveshjeje.
“Po flasim me njerëzit e duhur dhe ata duan të arrijnë një marrëveshje me çdo kusht. Nuk e keni idenë sa shumë e duan këtë”, u shpreh presidenti amerikan, duke pretenduar edhe një “sukses të madh” të SHBA në Iran.
Ndërkohë, sipas portalit Axios, Shtetet e Bashkuara dhe ndërmjetës ndërkombëtarë po shqyrtojnë mundësinë e zhvillimit të një takimi të nivelit të lartë për paqen me Iranin që mund të mbahet që të enjten.
Megjithatë, burimet bëjnë të ditur se aktualisht pritet një përgjigje nga Teherani për të konfirmuar nëse do të marrë pjesë në këto bisedime.
