Presioni për largimin e Nicolás Maduro-s nga pushteti në Venezuelë është shtuar ndjeshëm nga administrata e presidentit amerikan Donald Trump, shkruan New York Times.
Sipas raportimit, zyrtarë të lartë po diskutojnë një fushatë të gjerë që parashikon rritjen e presionit ushtarak ndaj regjimit të Maduro-s.
Iniciativa udhëhiqet kryesisht nga senatori Marco Rubio, i mbështetur nga Sekretari i Shtetit dhe këshilltari i sigurisë kombëtare. Rubio e cilëson Maduro-n si një udhëheqës ilegjitim, përgjegjës për trafikun e drogës drejt SHBA-së, të cilin e konsideron një “kërcënim të menjëhershëm”.
Në javët e fundit, ushtria amerikane ka kryer sulme kundër anijeve civile që dyshohej se kontrabandonin drogë për grupet venezueliane, ndërsa Pentagon-i ka vendosur mbi 6.500 trupa në rajon. Burime të NYT bëjnë me dije se Rubio po shtyn për një strategji më agresive, duke u mbështetur te informacionet e CIA-s.
Krahas tij, edhe drejtori i inteligjencës John Ratcliffe dhe këshilltari i Trump-it, Stephen Miller, mbështesin këtë qasje. Sipas tyre, për shkak se Maduro drejton rrjetin e karteleve venezueliane, ndërhyrja kundër tij mund të paraqitet si një operacion kundër narkotikëve.
Rubio thekson vazhdimisht akuzat e Departamentit të Drejtësisë të vitit 2020 ndaj Maduro-s për trafik droge, duke e përshkruar atë si një “të arratisur nga drejtësia amerikane” dhe si kreun e një “organizate terroriste e kriminale” që ka kapur një shtet të tërë.
Ndërkohë, dy figura kryesore të opozitës venezueliane kanë deklaruar se tashmë kanë planifikuar hapat për pas rrëzimit të mundshëm të Maduro-s dhe kanë zhvilluar bisedime për këtë skenar me administratën Trump.
