Presidenti amerikan Donald Trump ka deklaruar se ushtria e SHBA-së po shqyrton “opsione shumë të forta” ndaj Iranit, ndërsa protestat antiqeveritare në vend kanë hyrë në javën e tretë dhe, sipas raportimeve, kanë shkaktuar qindra viktima.
Agjencia amerikane Human Rights Activist News Agency (HRANA) njofton se ka verifikuar vdekjen e rreth 500 protestuesve dhe 48 pjesëtarëve të forcave të sigurisë në Iran. Ndërkohë, burime për BBC bëjnë me dije se numri real i viktimave mund të jetë edhe më i lartë.
Trump ka kërcënuar me ndërhyrje dhe deklaroi të dielën se zyrtarë iranianë e kanë telefonuar atë “për të negociuar”, por shtoi se “mund të na duhet të veprojmë përpara një takimi”.
Udhëheqësit iranianë i kanë përshkruar protestuesit si “një tufë vandalësh” dhe u kanë bërë thirrje mbështetësve të regjimit të marrin pjesë në marshime pro-qeveritare të hënën. Qeveria ka shpallur gjithashtu tri ditë zie për ata që i cilëson si “martirë”, të vrarë në atë që e quan “betejë kombëtare kundër SHBA-së dhe Izraelit”, dy vende që Teherani i akuzon për nxitjen e trazirave.
Zemërimi publik shpërtheu në fund të dhjetorit, pas rënies së ndjeshme të vlerës së monedhës iraniane. Që prej asaj kohe, protestat janë shndërruar në një krizë serioze legjitimiteti për Udhëheqësin Suprem të Iranit, Ajatollah Ali Khamenei.
Trump nuk ka dhënë ende detaje konkrete mbi opsionet ushtarake që po shqyrton SHBA-ja, as për negociatat e përmendura, pavarësisht se ka thënë se “po përgatitet një takim” me zyrtarë iranianë. Ai shtoi se udhëheqësit e Iranit “duan të negociojnë”, sepse sipas tij “janë lodhur duke u rrahur nga Shtetet e Bashkuara”.
Një zyrtar amerikan i tha CBS, partnerit amerikan të BBC-së, se Trump është informuar mbi opsionet për sulme ushtarake ndaj Iranit. Sipas burimeve të cituara nga Wall Street Journal, alternativa të tjera që po shqyrtohen përfshijnë forcimin e burimeve antiqeveritare në internet, përdorimin e armëve kibernetike kundër ushtrisë iraniane, si dhe vendosjen e sanksioneve shtesë.
