Media të mëdha amerikane, përfshirë New York Times dhe Fox News, raportojnë se ekipi ligjor i Presidentit të SHBA-ve, Donald Trump, i ka dërguar një letër zyrtare BBC-së, duke e paralajmëruar për një padi të mundshme prej 1 miliard dollarësh.
Në letrën e firmosur nga avokatët e Trump, thuhet se BBC ka “shpifur dhe manipuluar” publikun me dokumentarin Panorama, ku dy pjesë të një fjalimi të vitit 2021 janë montuar në mënyrë që të krijojnë përshtypjen se Trump kishte nxitur sulmin ndaj Kapitolit.
Sipas mediave amerikane, BBC-së i është dhënë afat deri më 14 nëntor për të bërë “një tërheqje të plotë dhe të drejtë” të dokumentarit, përndryshe do të përballet me procedura ligjore për “dëme të rënda ndaj reputacionit të Presidentit Trump”.
Letra vjen pak ditë pas dorëheqjes së drejtorit të përgjithshëm të BBC-së, Tim Davie, dhe shefes së lajmeve, Deborah Turness, të cilët morën përgjegjësinë për “gabime editoriale” në realizimin e dokumentarit.
