Presidenti i Shteteve të Bashkuara të Amerikës, Donald Trump, është shprehur së fundmi optimist lidhur me ecurinë e bisedimeve për t’i dhënë fund luftës në Gaza, duke e konsideruar këtë proces si mundësinë e parë reale për arritjen e një paqeje të qëndrueshme në Lindjen e Mesme.
Në një intervistë të dhënë për median amerikane “Axios”, Trump deklaroi se negociatat po hyjnë në fazën e tyre përfundimtare dhe se ekziston një mundësi e lartë që marrëveshja të finalizohet brenda dy ditëve të ardhshme. Ai theksoi se një moment vendimtar do të jetë takimi i tij i planifikuar për ditën e hënë me Kryeministrin izraelit Benjamin Netanyahu në Zyrën Ovale.
“Të gjithë po punojnë së bashku për të arritur një marrëveshje, por ne duhet ta arrijmë atë,” u shpreh presidenti amerikan në një telefonatë me gazetarin e Axios, Barak Ravid.
Trump vlerësoi gjithashtu rolin e vendeve arabe në këtë proces, duke e përshkruar bashkëpunimin me to si “fantastik” dhe duke shprehur respekt të veçantë për botën arabe. Sipas tij, palët kryesore të përfshira, përfshirë Izraelin dhe vendet arabe, kanë treguar qartë dëshirën e tyre për t’i dhënë fund konfliktit.
“Bota arabe dëshiron paqe, Izraeli dëshiron paqe dhe Bibi dëshiron paqe,” tha Trump, duke iu referuar Netanyahu-t me nofkën e tij të njohur.
Presidenti amerikan theksoi se arritja e kësaj marrëveshjeje do të përbëjë një pikë kthese historike, duke e cilësuar si shansin e parë të vërtetë për paqe në Lindjen e Mesme pas dekadash konfliktesh dhe tensione të vazhdueshme.
