Presidenti amerikan Donald Trump deklaroi se nuk dëshironte një “takim të kotë”, pasi planet për një takim ballë për ballë me presidentin rus Vladimir Putin mbi luftën në Ukrainë u pezulluan.
Në një deklaratë nga Shtëpia e Bardhë të martën, Trump tha se arsyeja kryesore e ngecjes ishte refuzimi i Moskës për të ndalur luftimet përgjatë vijës aktuale të frontit.
Më herët, një zyrtar i Shtëpisë së Bardhë kishte njoftuar se “nuk ka plane për një takim Trump-Putin në të ardhmen e afërt”, ndonëse Trump kishte thënë javën e kaluar se do të takoheshin në Budapest brenda dy javësh.
Mospërputhjet mes propozimeve amerikane dhe ruse për paqe janë bërë gjithnjë e më të dukshme këtë javë, duke zbehur shpresat për një samit. Dy liderët u takuan për herë të fundit në gusht, në Alaskë, në një samit të organizuar me nxitim që nuk prodhoi rezultate konkrete.
Vendimi i Shtëpisë së Bardhë për të pezulluar planet për një takim të dytë shihet si përpjekje për të shmangur një përsëritje të një skenari të ngjashëm.
“Supozoj se rusët kërkuan shumë dhe u bë e qartë për amerikanët se nuk do të kishte marrëveshje për Trump në Budapest,” tha për “Reuters” një diplomat i lartë evropian.
Një takim paraprak mes Sekretarit amerikan të Shtetit, Marco Rubio, dhe Ministrit të Jashtëm rus, Sergei Lavrov, ishte planifikuar për këtë javë – por Shtëpia e Bardhë njoftoi se pas një “telefonate produktive”, takimi nuk ishte më i nevojshëm.
Të hënën, Trump mbështeti një propozim për armëpushim të përkrahur nga Kievi dhe udhëheqësit evropianë, për ngrirjen e konfliktit në vijën aktuale të frontit.
“Le të mbetet siç është,” tha ai. “Thashë: ndërpriteni në vijën e betejës. Shkoni në shtëpi. Ndaloni luftimet, ndaloni vrasjet.”
Rusia ka kundërshtuar vazhdimisht ngrirjen e frontit aktual. Zëdhënësi i Kremlinit, Dmitry Peskov, tha se ideja u është paraqitur rusëve disa herë, por “qëndrimi i Rusisë mbetet i pandryshuar”, duke iu referuar kërkesës për tërheqjen e plotë të forcave ukrainase nga rajonet lindore.
