Shtetet e Bashkuara të Amerikës nuk duan dhe nuk do të përdorin forcën për të marrë Groenlandën, ishullin e vetëqeverisur danez që SHBA-të e kanë konsideruar jetik për sigurinë e tyre kombëtare. Ky ishte mesazhi i Presidentit amerikan Donald Trump gjatë fjalimit të tij në Forumin Ekonomik Botëror në Davos të Zvicrës.
Gjatë fjalës së tij, Trump kritikoi vendet e Bashkimit Evropian, duke deklaruar se Unioni me 27 anëtarë, sipas tij, nuk po ecën në drejtimin e duhur, veçanërisht për shkak të politikave të emigracionit, të cilat ai i cilësoi si shkatërruese për Perëndimin.
“Groenlanda është një territor i gjerë, pothuajse tërësisht i pabanuar dhe i pazhvilluar, i pambrojtur, në një vendndodhje kyçe strategjike midis Shteteve të Bashkuara, Rusisë dhe Kinës. Ka vetëm një fakt të qartë: asnjë komb apo grup kombesh nuk është në gjendje të sigurojë Groenlandën përveç Shteteve të Bashkuara. Kjo është arsyeja pse po kërkoj negociata të menjëhershme për të diskutuar përsëri blerjen e Groenlandës nga Shtetet e Bashkuara, ashtu siç kemi fituar shumë territore të tjera gjatë historisë sonë, siç kanë bërë edhe shumë nga kombet evropiane. Ndoshta nuk do të arrijmë asgjë nëse nuk do të përdorim forcën për marrjen e këtij territori, sinqerisht do të ishim të pandalshëm, por unë nuk do ta bëj diçka të tillë.”
Trump deklaroi gjithashtu se Shtetet e Bashkuara planifikojnë të ndërtojnë në Groenlandë sistemin më të madh të mbrojtjes ajrore, një version të “Iron Dome”, duke e arsyetuar marrjen e këtij territori si një shpërblim për kontributin që Uashingtoni ka dhënë për NATO-n, veçanërisht gjatë administratës së tij.
“Ne japim kaq shumë dhe marrim kaq pak në këmbim. Unë kam qenë kritik i NATO-s për shumë vite, megjithatë kam bërë më shumë për të ndihmuar NATO-n sesa çdo president tjetër deri më tani. NATO nuk do të ekzistonte nëse unë nuk do të isha përfshirë në mandatin tim të parë. Trashëgova një luftë, një katastrofë – po flas për Ukrainën. Jemi mijëra kilometra larg, të ndarë nga një oqean gjigant, dhe kjo është një luftë që nuk duhej të kishte filluar kurrë dhe nuk do të kishte filluar nëse zgjedhjet presidenciale të SHBA-së të vitit 2020 nuk do të ishin manipuluar.”
Në përfundim, Presidenti amerikan deklaroi se Shtetet e Bashkuara po punojnë si me Rusinë ashtu edhe me Ukrainën për t’i dhënë fund luftës në Ukrainë, konfliktit më të ashpër në Evropë që prej Luftës së Dytë Botërore.
