Presidenti amerikan Donald Trump do të pritet këtë javë në Mbretërinë e Bashkuar me një ceremoni shtetërore të jashtëzakonshme, ku në qendër do të jetë Familja Mbretërore dhe Mbreti Charles III.
Vizita është përgatitur si një ofensivë e plotë “magjie mbretërore”, me roje nderi, karroca historike, bankete madhështore dhe ceremoni të shumta, të cilat pritet ta mahnisin presidentin amerikan, i njohur për adhurimin e tij ndaj monarkisë.
Qeveria britanike shpreson që pritja e artë t’i shërbejë për të përçuar mesazhe të rëndësishme lidhur me Ukrainën dhe marrëdhëniet tregtare, ndërkohë që ekspertët vlerësojnë se Charles ka një “avantazh të rrallë” në raport me Trump, pikërisht për shkak të entuziazmit të tij ndaj mbretërorëve.
Megjithatë, mbetet sfidë fakti që qëndrimet e Mbretit për mjedisin, demokracinë dhe sundimin e ligjit janë larg filozofisë së presidentit amerikan. Për këtë arsye, Mbreti do të ndjekë me kujdes skenarin e përgatitur nga qeveria britanike, duke ruajtur korrektesën dhe neutralitetin politik.
Vizita ka një program të ngjeshur prej një dite e gjysmë, e mbushur kryesisht me aktivitete ceremoniale në Windsor, të zhvilluara me masa të larta sigurie dhe pa pjesëmarrje publike. Kulmi i pritjes do të jetë banketi shtetëror në Kështjellën Windsor, ku Mbreti Charles do të mbajë një fjalim në nder të Trump, duke theksuar marrëdhënien e veçantë mes dy vendeve.
Familja Mbretërore do të jetë e angazhuar plotësisht në pritje – Princi William dhe Princesha Catherine do të marrin pjesë në ceremoninë zyrtare dhe një vizitë me Skautët, ndërsa Mbretëresha Camilla do të shoqërojë Zonjën e Parë Melania Trump në një tur simbolik në Windsor.
Kjo është vizita e dytë shtetërore e Trump në Britani – një gjë e rrallë për një president amerikan – dhe vjen në një moment të rëndësishëm diplomatik, ku Mbreti Charles shihet si një figurë që përdor fuqinë e butë për të ndërtuar ura në kohë tensionesh politike.
Ekspertët thonë se, pavarësisht dallimeve të thella mes tyre, “kimi mes Trump dhe Mbretit Charles do të jetë shumë interesante”, ndërsa qeveria britanike pret që simpatia e presidentit për monarkinë të kthehet në një kartë të fortë diplomatike.
