Presidenti i Donald Trump ka njoftuar se më 19 shkurt 2026 do të zhvillojë një takim me iniciativën ndërkombëtare “Board of Peace”, ku pritet të shpallet një paketë angazhimesh financiare dhe sigurie për Gazën.
Në një deklaratë të publikuar në platformën Truth Social, Trump bëri të ditur se shtetet anëtare të këtij bordi kanë premtuar mbi 5 miliardë dollarë për ndihmë humanitare dhe rindërtim në Gaza. Sipas tij, vendet pjesëmarrëse janë angazhuar gjithashtu të kontribuojnë me mijëra efektivë në një forcë ndërkombëtare stabilizimi dhe në strukturat e policisë lokale për të garantuar sigurinë dhe paqen për banorët e zonës.
Trump theksoi se iniciativa “Board of Peace” ka “potencial të pakufizuar” dhe rikujtoi se në tetor të vitit të kaluar ai kishte prezantuar një plan për përfundimin e përhershëm të konfliktit në Gaza, i cili – sipas tij – u miratua unanimisht nga United Nations Security Council.
Ai shtoi se pas prezantimit të planit, u mundësua shpërndarja e ndihmës humanitare me ritme të përshpejtuara dhe lirimi i pengjeve. Presidenti amerikan deklaroi se takimi i radhës do të mbahet në Institutin “Donald J. Trump” për Paqe në Uashington, D.C., ku do të formalizohen angazhimet e reja.
Në deklaratën e tij, Trump kërkoi që Hamas të respektojë angazhimin për çmilitarizim të plotë dhe të menjëhershëm, duke e cilësuar “Board of Peace” si një nga trupat më me ndikim ndërkombëtar dhe duke theksuar se është nder për të të shërbejë si kryetar i tij.
