Presidenti amerikan Donald Trump u prit me duartrokitje dhe brohoritje në rikthimin e tij në Jerusalem, ku mbajti një fjalim para Knesset-it izraelit.
“Vend i bukur, vend vërtet i bukur,” tha ai në hapje të fjalës së tij, duke e përshkruar momentin si “një ditë gëzimi të thellë dhe shprese në rritje”.
Trump njoftoi me entuziazëm kthimin e pengjeve, duke thënë:
“Pas dy vitesh të tmerrshme në errësirë dhe robëri, 20 pengje të guximshme po kthehen në përqafimin e lavdishëm të familjeve të tyre. 28 të tjerë të çmuar po kthehen më në fund në shtëpi për t’u prehur në këtë tokë të shenjtë përgjithmonë.”
Ai deklaroi se “armët heshtin” dhe se rajoni tashmë është “në paqe”, duke shpresuar se “do të mbetet i tillë përgjithmonë”.
Trump e cilësoi këtë moment si “agimi historik i një Lindjeje të Mesme të re”, ndërsa lavdëroi kryeministrin Benjamin Netanyahu:
“Nuk është njeriu më i lehtë për t’u përballur… por kjo e bën të madh. Kjo e bën të mirë. Faleminderit shumë Bibi, punë e shkëlqyer.”
Gjatë fjalimit pati edhe një ndërprerje, kur një deputet i majtë izraelit ndërhyri me thirrje kundërshtuese dhe u nxorr jashtë sallës. Kryeparlamentari kërkoi falje, ndërsa Trump reagoi me humor: “Shumë efikase.”
Në mbyllje, ai theksoi se ky moment “do të mbahet mend nga brezat si çasti kur gjithçka filloi të ndryshojë — dhe për më mirë.”
