Presidenti i SHBA-së, Donald Trump, ka kërkuar “dorëzim pa kushte” nga Irani, duke rritur ndjeshëm presionin ndaj Teheranit një javë pas nisjes së luftës së përbashkët me Izraelin.
Në një postim në rrjetet sociale të premten, Trump shkroi se nuk do të ketë asnjë marrëveshje me Iranin përveç një “UNCONDITIONAL SURRENDER”. Ai shtoi se pas dorëzimit dhe zgjedhjes së një udhëheqësi të ri të pranueshëm për Iranin, SHBA dhe aleatët e saj do të punojnë për ta rikthyer vendin “nga pragu i shkatërrimit” dhe për ta bërë ekonomikisht më të fortë se më parë.
Deklarata erdhi vetëm disa orë pasi presidenti iranian Masoud Pezeshkian njoftoi se disa vende kanë nisur përpjekje ndërmjetësimi për t’i dhënë fund konfliktit, një nga sinjalet e para për një iniciativë diplomatike.
Kërkesa e Trump për dorëzim pa kushte shkaktoi menjëherë tronditje në tregjet financiare. Bursat europiane ranë menjëherë pas deklaratës, ndërsa edhe Wall Street u hap me rënie të ndjeshme.
Një ditë më parë, Trump kishte deklaruar në një intervistë për Reuters se kërkon të ketë rol edhe në përzgjedhjen e udhëheqësit të ri suprem të Iranit, për të zëvendësuar Ajatollah Ali Khamenein, i vrarë në ditën e parë të luftës.
Ndërkohë në terren, Izraeli ka zgjeruar operacionet ushtarake në Liban. Ushtria izraelite goditi të premten kryeqytetin Beirut, pasi urdhëroi evakuimin masiv të periferive jugore të qytetit.
Sipas Izraelit, sulmet kishin në shënjestër një qendër komande të njësisë detare të Gardës Revolucionare iraniane, si edhe disa qendra të përdorura nga Hezbollah. Nuk pati reagim të menjëhershëm nga Garda Revolucionare apo nga grupi militant libanez.
Izraeli njoftoi gjithashtu për një valë të re sulmesh ndaj Iranit, duke thënë se rreth 50 avionë luftarakë goditën një bunker që përdorej ende nga drejtuesit iranianë nën kompleksin e shkatërruar të Khameneit në Teheran.
Presidenti iranian Pezeshkian deklaroi se Irani është i gatshëm për paqe, por theksoi se vendi nuk do të hezitojë të mbrojë “dinjitetin dhe autoritetin” e tij.
Ndërkohë Izraeli ka zgjeruar bombardimet edhe në Liban për të goditur Hezbollahun, aleatin kryesor të Iranit në rajon. Grupi shiit kishte lëshuar raketa drejt Izraelit këtë javë në shenjë hakmarrjeje për vdekjen e Khameneit.
