Presidenti amerikan Donald Trump i ka bërë thirrje Kubës që të “bëjë një marrëveshje” me Shtetet e Bashkuara, duke paralajmëruar se përndryshe do të përballet me pasoja, ndërsa ka deklaruar se furnizimi me naftë dhe para nga Venezuela do të ndalet.
Trump e ka përqendruar vëmendjen e tij te Kuba pas operacionit të forcave amerikane më 3 janar, gjatë të cilit u kap udhëheqësi i Venezuelës, Nicolás Maduro, në kryeqytetin e vendit. Venezuela, një aleate e hershme e Kubës, besohet se i dërgon ishullit rreth 35 mijë fuçi naftë në ditë, por Trump ka deklaruar se kjo do të marrë fund.
“Kuba ka jetuar për shumë vite me sasi të mëdha NAFTE dhe PARASH nga Venezuela. Në këmbim, Kuba u ka ofruar ‘shërbime sigurie’ dy diktatorëve të fundit të Venezuelës, POR JO MË!” – shkroi ai në rrjetin Truth Social.
“NUK DO TË KETË MË NAFTË APO PARA QË TË SHKOJNË NË KUBË – ZERO! Unë sugjeroj fuqimisht që të bëjnë një marrëveshje, PARA SE TË JETË SHUMË VONË.”
Trump nuk specifikoi kushtet e një marrëveshjeje apo pasojat konkrete me të cilat Kuba mund të përballet. Ai përmendi gjithashtu operacionin për kapjen e Madurës dhe bashkëshortes së tij, Cilia Flores, të cilët përballen me akuza për trafik droge dhe vepra të tjera penale në një gjykatë amerikane.
Për vite me radhë, Kuba i ka siguruar Madurës rojen personale. Qeveria kubane deklaroi se 32 shtetas kubanë u vranë gjatë operacionit amerikan në Karakas. Trump reagoi duke thënë: “Shumica e atyre kubanëve janë TË VDEKUR nga sulmi amerikan i javës së kaluar dhe Venezuela nuk ka më nevojë për mbrojtje nga banditët dhe zhvatësit që e mbajtën peng për kaq vite.”
“Venezuela tani ka Shtetet e Bashkuara të Amerikës, ushtrinë më të fuqishme në botë (me diferencë!), për ta mbrojtur – dhe ne do ta mbrojmë,” shtoi ai.
Qeveria kubane ende nuk ka reaguar ndaj kërcënimeve të fundit të Trump, por më herët presidenti Miguel Díaz-Canel tha se 32 “luftëtarët trima kubanë” të vrarë në Venezuelë do të nderoheshin për “përballjen me terroristët me uniforma imperialiste”.
Ndërsa administrata Trump nuk ka shpallur plane të qarta për Kubën, presidenti amerikan ka deklaruar më parë se një ndërhyrje ushtarake nuk ishte e nevojshme, pasi vendi ishte “gati të rrëzohej”.
Sekretari amerikan i Shtetit, Marco Rubio, tha javën e kaluar se drejtuesit kubanë duhet të shqetësohen, duke shtuar se “nëse do të isha në qeverinë e Kubës, do të isha shumë i shqetësuar – ata janë në telashe serioze”.
Të dielën, Trump ripostoi gjithashtu në rrjetet sociale një mesazh që sugjeronte se Rubio – një amerikano-kuban dhe ish-senator nga Florida – mund të bëhej president i Kubës, duke e shoqëruar me komentin: “Më duket ide e mirë!”
Ndërkohë, taktika e administratës Trump për konfiskimin e cisternave të naftës venezueliane nën sanksione ka nisur tashmë të përkeqësojë krizën e karburanteve dhe energjisë elektrike në Kubë.
