Presidenti i SHBA-së, Donald Trump, deklaroi të hënën se është i zemëruar dhe i shqetësuar pas pretendimit të presidentit rus Vladimir Putin se Ukraina ka tentuar të sulmojë rezidencën e tij në Rusi, një akuzë që Kievi e ka mohuar.
Duke folur për mediat, Trump tha se një sulm i tillë i supozuar mund të dëmtojë përpjekjet për ndërmjetësim paqeje në Ukrainë. “Nuk më pëlqen. Nuk është mirë… Isha shumë i zemëruar për këtë,” u shpreh ai.
Trump bëri të ditur se ka zhvilluar një telefonatë “shumë të mirë” me Putinin, gjatë së cilës janë diskutuar çështje urgjente që lidhen me luftën në Ukrainë dhe mundësitë për arritjen e një marrëveshjeje paqeje.
I pyetur nëse ka prova për sulmin e pretenduar, Trump tha se kjo mbetet për t’u verifikuar, duke shtuar se periudha aktuale është shumë delikate për veprime të tilla. “Nuk është koha e duhur. Është një gjë të jesh ofendues në luftë dhe tjetër gjë të sulmosh shtëpinë e tij,” theksoi ai.
Deklaratat vijnë në një moment të ndjeshëm për konfliktin në Ukrainë dhe mund të ndikojnë në përpjekjet diplomatike për ndërmjetësimin e paqes, një objektiv që Trump ka deklaruar se synon ta ndjekë.
