Presidenti i SHBA-së, Donald Trump, deklaroi të hënën se është në kontakt me Elon Musk, duke theksuar se të dy kanë folur “herë pas here” që pas takimit të tyre në funeralin e Charlie Kirk muajin e kaluar në Arizona, dhe se marrëdhënia e tyre “është tashmë e mirë”.
Duke folur për gazetarët në avionin presidencial gjatë udhëtimit drejt Japonisë, Trump tha se “gjithmonë e ka pëlqyer” Elon Musk, pavarësisht përplasjeve të së kaluarës.
“Gjithmonë më ka pëlqyer Elon. Kaloi një periudhë të vështirë, një moment jo të mirë. Por më pëlqen Elon, dhe mendoj se gjithmonë do të më pëlqejë”, u shpreh ai duke iu përgjigjur një pyetjeje nga Politico.
Këto deklarata shënojnë një fazë të re pajtimi mes Trump dhe Musk, pas një vere të mbushur me përplasje publike. Dyshja kishin shkëmbyer akuza personale dhe kërcënime politike, pasi miliarderi dhe pronari i platformës X kishte lënë të hapur mundësinë për të mbështetur kandidatë kundër republikanëve, madje edhe për krijimin e një partie të re me emrin “America Party”.
Në atë periudhë, Trump e kishte paralajmëruar Musk për “pasoja shumë serioze” nëse do të vazhdonte me planet e tij, duke lënë të kuptohej se mund të vepronte ndaj tij përmes një agjencie qeveritare të efikasitetit, të cilën Musk e kishte ndihmuar të ngrinte në fillimet e saj.
