Të paktën 22 migrantë humbën jetën të mërkurën pasi dy anije u fundosën pranë bregut të Lampedusës, raportojnë agjencitë humanitare. Rreth 60 persona janë shpëtuar, ndërsa shumë të tjerë konsiderohen të zhdukur. Sipas Kryqit të Kuq, 56 burra dhe katër gra u nxorën gjallë nga deti, por numri i saktë i udhëtarëve në bord mbetet i paqartë.
Anijet ishin nisur mbrëmjen e së martës nga Zavija dhe Tripoli në Libi. Sipas rrëfimeve të të mbijetuarve për agjencinë italiane ANSA, pasi një prej anijeve filloi të fundosej, disa migrantë u zhvendosën në tjetrën, e cila u mbingarkua dhe u përmbyt. Ndër viktimat e para të transportuara në morgun e Lampedusës ishin një foshnjë e sapolindur, tre fëmijë, dy burra dhe dy gra.
Zëdhënësi i UNHCR-së, Filippo Ungaro, konfirmoi se janë gjetur 20 trupa dhe po aq persona figurojnë ende të zhdukur. Ministri i Brendshëm italian, Matteo Piantedosi, tha se tragjedia ndodhi rreth 14 milje detare nga Lampedusa, ndërsa raportet mediatike flasin për 97 persona në dy anijet.
Sipas UNHCR-së, vetëm këtë vit 675 migrantë kanë humbur jetën në përpjekje për të kaluar Mesdheun, ndërsa mbi 38 mijë kanë mbërritur në Itali. Piantedosi e cilësoi episodin si një thirrje urgjente për të ndaluar udhëtimet e rrezikshme që nisin nga Afrika e Veriut, ku Italia ka nënshkruar marrëveshje bashkëpunimi për frenimin e fluksit të migrantëve.
