Danimarka, Finlanda, Franca, Gjermania, Holanda, Norvegjia, Suedia dhe Mbretëria e Bashkuar kanë publikuar një deklaratë të përbashkët ku riafirmojnë angazhimin e tyre për forcimin e sigurisë në Arktik, duke e cilësuar atë si një interes të përbashkët transatlantik.
Sipas deklaratës, si anëtare të NATO-s, këto vende theksojnë se stërvitja e koordinuar paraprakisht nga Danimarka, e quajtur “Arctic Endurance” dhe e zhvilluar në bashkëpunim me aleatët, vjen si përgjigje ndaj nevojës për rritjen e sigurisë në rajon dhe nuk përbën kërcënim për askënd.
Vendet nënshkruese shprehin solidaritet të plotë me Mbretërinë e Danimarkës dhe popullin e Grenlandës. Ato deklarojnë se, duke u bazuar në procesin e nisur javën e kaluar, janë të gatshme të angazhohen në dialog, të mbështetur fort në parimet e sovranitetit dhe integritetit territorial.
Në deklaratë shprehet gjithashtu shqetësim për kërcënimet me tarifa tregtare, të cilat, sipas tyre, dëmtojnë marrëdhëniet transatlantike dhe rrezikojnë të çojnë në një spirale të rrezikshme përshkallëzimi. Vendet theksojnë se do të vazhdojnë të qëndrojnë të bashkuara dhe të koordinuara në përgjigjen e tyre, duke nënvizuar përkushtimin për mbrojtjen e sovranitetit të tyre.
