Venezuela ka ndërmarrë masa për të rritur sigurinë përgjatë kufirit me Kolumbinë, në një kohë kur administrata e presidentit amerikan Donald Trump ka urdhëruar vendosjen e anijeve luftarake në Karaibet jugore, me qëllim goditjen e karteleve të drogës në rajon.
Sipas autoriteteve venezueliane, rreth 15 mijë trupa policore dhe ushtarake janë dislokuar në shtetet kufitare Zulia dhe Táchira. Lajmi u konfirmua nga ministri i Brendshëm, Diosdado Cabello, i cili në një deklaratë për mediat tha se këtyre forcave do t’u bashkohen edhe mjete detare, avionë dhe dronë për të garantuar sigurinë dhe ruajtjen e paqes në kufi.
“Presidenti ka dhënë urdhër për këtë dislokim me qëllim ruajtjen e paqes. Nëse dikush synon të hyjë në territorin tonë nga kufiri, nuk do ta ketë të mundur,” u shpreh Cabello. Ai gjithashtu i bëri thirrje Kolumbisë që të marrë masa të ngjashme, duke theksuar marrëdhëniet e mira mes dy vendeve.
Ndërkohë, Shtetet e Bashkuara kanë konfirmuar se tre anije luftarake që transportojnë mbi 4,000 marinarë dhe ushtarë janë nisur drejt rajonit. Sipas raportimeve, presidenti Trump i ka kërkuar Pentagonit të përgatitet për operacione të mundshme ushtarake në Amerikën Latine, duke shkaktuar shqetësim mes liderëve të rajonit.
Javën e kaluar, presidenti venezuelian Nicolás Maduro mohoi raportimet për ndërhyrje ushtarake amerikane, por paralelisht u bëri thirrje qytetarëve të bashkohen në radhët e milicive për mbrojtjen e vendit. Mediat shtetërore kanë nisur tashmë transmetimin e reklamave që nxisin pjesëmarrjen në fushatën e rekrutimit.
