Shefi i Shtabit të Përgjithshëm të Forcave të Mbrojtjes së Izraelit (IDF), gjenerali Eyal Zamir, deklaroi se Irani ka demonstruar aftësi për të goditur edhe kryeqytete europiane me raketa balistike me rreze shumë të gjatë.
Sipas Zamir, vetëm një ditë më parë Irani lëshoi një raketë balistike ndërkontinentale me dy faza, me një rreze veprimi rreth 4 mijë kilometra, drejt një objektivi amerikan në ishullin Diego Garcia në Oqeanin Indian.
“Këto raketa nuk ishin të destinuara për të goditur Izraelin. Rrezja e tyre arrin kryeqytetet europiane: Berlini, Parisi dhe Roma janë të gjitha në rrezen e goditjes direkte”, u shpreh Zamir.
Deklarata vjen në një moment kur tensionet në Lindjen e Mesme janë rritur ndjeshëm dhe shqetësimi për kapacitetet raketore të Iranit po zgjerohet edhe përtej rajonit, duke përfshirë sigurinë e Evropës.
