Dy persona u vranë dhe dhjetëra të tjerë u plagosën pas të shtënave pranë një “beer garden” në Austin të Texas, në një incident që FBI thotë se mund të lidhet me terrorizmin. I dyshuari është identifikuar nga mediat amerikane si Ndiaga Diagne, shtetas amerikan i natyralizuar me origjinë nga Senegali. Policia, pasi iu përgjigj një thirrjeje për një sulmues aktiv rreth orës 02:00 të mëngjesit, e qëlloi për vdekje autorin, duke e çuar bilancin e viktimave në tre.
Sipas shefes së policisë së Austin, Lisa Davis, i dyshuari fillimisht qëlloi me pistoletë nga një SUV drejt personave në trotuar dhe në ambientet e jashtme të barit Buford’s, më pas doli nga makina me një pushkë dhe u drejtua sërish drejt zonës, ku u përball me policinë.
Autoritetet konfirmuan se në automjet nuk u gjetën eksplozivë, por zyrtarë të FBI-së thanë se janë zbuluar elemente që sugjerojnë një lidhje të mundshme me terrorizmin. Hetimet janë ende në fazë të hershme dhe motivi nuk është bërë publik.
Nga 14 të plagosurit që u dërguan në spital, tre janë në gjendje kritike. Presidenti amerikan Donald Trump është informuar për ngjarjen, ndërsa zyrtarë federalë dhe lokalë kanë dënuar sulmin dhe kanë vlerësuar reagimin e shpejtë të forcave të rendit.
