Negociatorët ukrainas dhe rusë diskutuan ditën e sotme në Abu Dhabi çështjen territoriale, një nga temat më të vështira në axhendën e bisedimeve, pa shenja kompromisi deri më tani. Sipas raportimeve, negociatat do të vazhdojnë edhe gjatë ditës së nesërme. Ndërkohë, sulmet ajrore ruse kanë zhytur Ukrainën në krizën më të rëndë energjetike që nga fillimi i luftës.
Kievi po përballet me presion në rritje nga Shtetet e Bashkuara për të arritur një marrëveshje paqeje në konfliktin që nisi me pushtimin rus në shkurt të vitit 2022. Nga ana tjetër, Moska kërkon që Ukraina të dorëzojë të gjithë rajonin industrial të Donbasit për t’i dhënë fund luftës.
Presidenti ukrainas Volodymyr Zelensky konfirmoi se çështja territoriale do të jetë qendrore në bisedimet që po zhvillohen në Emiratet e Bashkuara Arabe dhe që pritet të përfundojnë të shtunën.
“Gjëja më e rëndësishme është që Rusia të jetë e gatshme t’i japë fund luftës që filloi”, tha Zelensky në një mesazh në Telegram. Ai shtoi se është në kontakt të vazhdueshëm me delegacionin ukrainas, por theksoi se është ende shumë herët për të nxjerrë përfundime nga bisedimet e sotme.
“Do të shohim se si do të ecë diskutimi nesër dhe cili do të jetë rezultati”, përfundoi ai.
Një ditë më parë, Zelensky u takua me Presidentin e SHBA-së, Donald Trump, në Forumin Ekonomik Botëror në Davos, por takimi nuk solli rezultate të menjëhershme.
