Howard Rubin, ish-menaxheri i fondeve të miliarderit George Soros dhe një emër i njohur në botën e financës në Wall Street, është vënë në pranga, pas një hetimi të thelluar që zbuloi akuza serioze për abuzim seksual dhe shfrytëzim të grave për prostitucion.
Sipas një raportimi të New York Post, Rubin u arrestua në rezidencën e tij në Fairfield, Connecticut, pas ngritjes së një aktakuze me 10 pika, e cila përfshin edhe akuzën për “tortura të rënda”, siç bëri të ditur prokurori federal i Brooklyn-it, Joseph Nocella.
Gjatë periudhës 2009–2019, Rubin dyshohet se ka përdorur fillimisht hotele të shtrenjta në Manhattan për të zhvilluar aktivitetin e tij kriminal, përpara se të organizonte një apartament luksoz me dy dhoma gjumi, të pajisur me pajisje BDSM dhe teknologji për regjistrim audio-vizual, që shërbente si një qendër abuzimi seksual.
Hetuesit thonë se ambienti ishte i pajisur me kamera dhe kompjuterë për të dokumentuar gjithçka, ndërsa viktimat rekrutoheshin përmes agjencive të eskortave apo platformave të modeleve.
Rubin, i njohur me nofkat “Howie” dhe “H”, ka qenë për vite me radhë një figurë e rëndësishme në sektorin financiar, duke menaxhuar miliarda dollarë për Soros Fund Management dhe për klientë të tjerë të profilit të lartë.
Ndërkohë që hetimet po thellohen, prokuroria pritet të paraqesë prova të reja mbi rastin që po përshkruhet si një ndër skandalet më të mëdha që ka përfshirë ndonjëherë një figurë të Wall Street-it.
