Një tërmet politik ka goditur drejtësinë italiane. Andrea Delmastro, zëvendësministër i drejtësisë, ka dhënë dorëheqjen, ndërsa nga detyra është larguar edhe shefja e kabinetit të ministrit të drejtësisë, Giusi Bartolozzi.
Dorëheqja e Delmastro erdhi pas publikimit të lidhjeve të tij të biznesit me Miriam Caroccia, vajza e Mauro Caroccia, i dënuar si prestanome i klanit mafioz Senese. Sipas raportimeve, Delmastro kishte hapur restorantin “Bisteccheria d’Italia” së bashku me të dhe disa drejtues të partisë Fratelli d’Italia.
Ndërkohë, Giusi Bartolozzi u largua nga detyra për shkak të polemikave që lidhen me menaxhimin e fushatës referendare dhe deklaratat e saj të ashpra ndaj sistemit të drejtësisë, përfshirë edhe frazën për “skuadrën e ekzekutimit” kundër magjistratëve.
Në një deklaratë publike, Delmastro tha se ka dorëzuar dorëheqjen e parevokueshme, duke theksuar se edhe pse nuk ka bërë asgjë të paligjshme, ka kryer një “pakujdesi” për të cilën merr përgjegjësi.
Brenda partisë Fratelli d’Italia, publikimi i disa fotografive ku Delmastro shfaqet së bashku me Mauro Caroccia ka rritur shqetësimet se mund të dalin edhe zbulime të tjera. Ndërkohë, në parlament pritet që ministri i drejtësisë Carlo Nordio të japë shpjegime lidhur me këtë çështje gjatë një seance pyetje-përgjigjesh.
