Një zyrtar i Shtëpisë së Bardhë ka deklaruar se nuk ka “asnjë plan” që Presidenti i SHBA-së, Donald Trump, të takohet me homologun rus, Vladimir Putin, “në të ardhmen e afërt”.
Javën e kaluar, Trump kishte njoftuar se do të zhvillonte një takim me Putinin në Budapest brenda dy javësh për të diskutuar mbi luftën në Ukrainë. Një takim përgatitor midis Sekretarit të Shtetit amerikan, Marco Rubio, dhe ministrit të Jashtëm rus, Sergei Lavrov, ishte planifikuar për këtë javë, por sipas Shtëpisë së Bardhë, dy zyrtarët zhvilluan një “telefonatë produktive” dhe “takimi nuk ishte më i nevojshëm”.
Shtëpia e Bardhë nuk dha detaje të tjera mbi arsyet e shtyrjes së bisedimeve. Trump kishte folur në telefon me Putinin për samitin e Budapestit një ditë përpara se të takonte në Uashington presidentin ukrainas Volodymyr Zelensky. Sipas disa raportimeve, takimi i Trump me Zelensky-n ishte kthyer në një “përplasje me zë të lartë”, ku Trump thuhet se e kishte shtyrë homologun ukrainas të dorëzonte territore të mëdha në lindje të vendit si pjesë e një marrëveshjeje me Rusinë.
Megjithatë, të hënën, Trump u shpreh në mbështetje të një propozimi për armëpushim, të miratuar nga Kievi dhe liderët evropianë, që parashikon ngrirjen e konfliktit në vijën aktuale të frontit. “Le të ndahet ashtu siç është,” tha ai.
Moska, nga ana tjetër, ka kundërshtuar idenë e ngrirjes së vijës së kontaktit. Ministri rus i Jashtëm, Sergei Lavrov, deklaroi se Rusia ishte e interesuar për një “paqe afatgjatë dhe të qëndrueshme”, duke theksuar se ngrirja e frontit do të përbënte vetëm një armëpushim të përkohshëm.
Lavrov shtoi se duhej trajtuar “shkaku rrënjësor i konfliktit” — një formulim që Kremlini përdor për të nënkuptuar kërkesat maksimale të Moskës, përfshirë njohjen e sovranitetit të plotë rus mbi Donbasin dhe çmilitarizimin e Ukrainës, kushte që Kievi dhe aleatët e tij evropianë i konsiderojnë të papranueshme.
Nga ana e tij, Zelensky tha se diskutimet mbi vijën e frontit ishin “fillimi i diplomacisë”, por shtoi se Rusia “po bën gjithçka për të shmangur diplomacinë”. Ai theksoi se e vetmja çështje që mund ta bëjë Moskën “të vërë veshin” është ajo e furnizimit me armë me rreze të gjatë.
Telefonata e paparalajmëruar e Putinit me Trump-in javën e kaluar u zhvillua mes spekulimeve se SHBA-ja po përgatitet të dërgojë në Ukrainë raketa Tomahawk me rreze të gjatë, të afta të godasin thellë në territorin rus. Zelensky u shpreh se pikërisht çështja e raketave Tomahawk e kishte detyruar Rusinë të hynte në diskutime, duke e quajtur këtë “një investim të fortë në diplomaci.”
