Edgar Keret buzëqesh për herë të parë gjatë gjithë intervistës dhe i bie vetes lehtë me dorë në ballë. Si për të thënë: e dija që do të vinte ky moment.
«Doni që të them atë fjalë që fillon me G? Mund të them çfarë shoh: që Izraeli po shkatërron qytete të tëra, që po zhvendos miliona njerëz nga një vend në tjetrin, që po e përdor urinë si armë lufte. Shoh që është çnjerëzore, e tmerrshme, e papranueshme. Por kjo etje për ta emërtuar gjithçka vjen nga kultura e Instagramit. A është Putini si Hitleri? Jo, është ndryshe. A është ajo që po ndodh në Gaza një gjenocid? Nuk e di. Të ndalojmë këtë masakër, të lirojmë pengjet dhe pastaj të thërrasim juristët më të mirë në botë për të kuptuar nëse kjo tmerrësi hyn në kategorinë e gjenocidit – dhe atëherë do ta shpallim me zë të lartë: gjenocid. Por më parë, ju lutem, ta ndalojmë».
Lufta po përhapet, kabineti i Netanyahut ka vendosur pushtimin e plotë të Rripit të Gazës.
«Një makth. Po jetojmë një moment historik ku demokracia ka pushuar së funksionuari. Shumica dërrmuese e izraelitëve duan ta ndalojnë luftën dhe të lirojnë pengjet. Vetëm rreth 20% janë në favor të vazhdimit të dhunës, ndoshta edhe të rrafshimit të Gazës dhe përfitimit nga momenti për të shtypur palestinezët në Bregun Perëndimor. Janë afërsisht dy milionë njerëz, ekstremistë siç ka në shumë vende: racistë, mesianikë, fanatikë. Por janë një pakicë, si neonazistët në Gjermani. Vetëm se këtu janë në qeveri. Fatkeqësisht për ne dhe për palestinezët, ata janë ministra».
Corriere della Sera
