Forcat izraelite kryen sulme ajrore dhe granatime me artileri në disa zona të Rripit të Gazës herët të shtunën, duke shënuar shkeljet më të fundit të marrëveshjes së armëpushimit që ka qenë në fuqi që nga tetori 2025.
Burime lokale i thanë Anadolu se artileria izraelite goditi pjesët lindore të Qytetit të Gazës, zona që, sipas marrëveshjes së armëpushimit, janë nën kontroll izraelit.
Sipas të njëjtave burime, një avion luftarak izraelit goditi një objektiv në veri të Rripit të Gazës, ndërsa një helikopter ushtarak hapi zjarr drejt zonave lindore të qytetit Xhabalia.
Në jug të Gazës, avionët luftarakë izraelitë kryen një sulm ajror mbi qytetin e Rafahut, ndërsa mjete ushtarake izraelite qëlluan drejt zonave në veri të qytetit, i cili mbetet plotësisht nën kontroll izraelit.
Që nga tetori i vitit 2023, ushtria izraelite ka vrarë më shumë se 71.400 persona, kryesisht gra e fëmijë, dhe ka plagosur mbi 171.000 të tjerë në një ofensivë brutale që e ka lënë enklavën në rrënoja.
Pavarësisht armëpushimit, ushtria izraelite ka vijuar sulmet, duke vrarë 424 palestinezë dhe duke plagosur 1.189 të tjerë, sipas Ministrisë së Shëndetësisë.
