Shefi i Shtabit të Forcave të Armatosura të Iranit, gjenerali Amir Hatami, ka paralajmëruar Shtetet e Bashkuara për një “përgjigje të menjëhershme dhe shkatërruese”, vetëm pak orë pasi Teherani njoftoi se ka vënë në përdorim 1.000 dronë strategjikë.
“Përballë kërcënimeve me të cilat përballemi, prioriteti i ushtrisë është forcimi i avantazheve strategjike, me qëllim dhënien e një përgjigjeje të menjëhershme dhe shkatërruese ndaj çdo pushtimi apo sulmi”, deklaroi gjenerali iranian.
Sipas televizionit shtetëror iranian, pas urdhrave të dhëna nga Hatami, njësitë e artilerisë luftarake janë pajisur me “1.000 dronë strategjikë”, të prodhuar nga ushtria në bashkëpunim me Ministrinë e Mbrojtjes. Prodhimi i tyre, sipas autoriteteve iraniane, është fryt i “mësimeve të nxjerra nga lufta 12-ditore” me Izraelin në muajin qershor.
Zhvillimi i ri vjen në një moment tensionesh të shtuara në rajon, ndërsa ditët e fundit është raportuar edhe për mbërritjen e një aeroplanmbajtëseje amerikane në Lindjen e Mesme.
