Shtetet e Bashkuara po përkujtojnë sot 24-vjetorin e sulmeve terroriste të 11 Shtatorit 2001 me ceremoni solemne, aktivitete përkujtimore dhe vepra vullnetare kushtuar gati 3 mijë viktimave.
Familjarë të të ndjerëve, zyrtarë shtetërorë dhe figura politike u mblodhën në New York, Pentagon dhe Shanksville të Pensilvanisë për të nderuar jetët e humbura. Në New York, pranë memorialit kombëtar, u lexuan emrat e viktimave, ndërsa momente heshtjeje shënuan kohën e goditjes së Kullave Binjake. Në ceremoni mori pjesë nënpresidenti JD Vance me bashkëshorten e tij.
Në Pentagon, ku u nderuan 184 viktimat e sulmit, morën pjesë Presidenti Donald Trump dhe Zonja e Parë Melania Trump, përpara se të udhëtonin drejt Bronxit për një ndeshje bejsbolli. Në Shanksville, Sekretari i Çështjeve të Veteranëve, Doug Collins, përkujtoi pasagjerët e Flight 93, që humbën jetën duke sfiduar rrëmbyesit.
Përkujtimet e këtij viti zhvillohen nën masa të shtuara sigurie, vetëm një ditë pas vrasjes së aktivistit konservator Charlie Kirk në një universitet të Utah-ut. Autoritetet kanë paralajmëruar vëmendje të shtuar, veçanërisht në Ground Zero.
Sulmet e 11 Shtatorit, të orkestruara nga Al-Kaeda, morën 2,977 jetë dhe u pasuan nga luftërat amerikane në Afganistan e Irak, si dhe nga një luftë globale kundër terrorizmit që vazhdon të ndikojë edhe sot. Procesi gjyqësor ndaj Khalid Sheikh Mohammed, organizatori i dyshuar kryesor, mbetet ende i papërfunduar pas më shumë se dy dekadash.
