Sipas Reuters, administrata e Donald Trump po përgatit një paketë të re sanksionesh ndaj Rusisë, nëse Vladimir Putin nuk ndalon luftën në Ukrainë. Masat synojnë bankat ruse dhe transportin e naftës, si pjesë e përpjekjeve për të rritur presionin ndaj Moskës.
Uashingtoni gjithashtu mbështet përdorimin e aseteve të ngrira ruse nga BE-ja për blerjen e armëve amerikane për Ukrainën dhe po shqyrton përdorimin e fondeve të bllokuara ruse në SHBA për të ndihmuar Kievin.
Kjo paketë tregon se Shtëpia e Bardhë ka gati masa për përshkallëzim të mëtejshëm, pas sanksioneve të fundit ndaj kompanive energjetike Lukoil dhe Rosneft, të cilat rritën çmimin e naftës me mbi 2 dollarë për fuçi.
Aleatët evropianë po shpresojnë që SHBA të mbajë presionin ndaj Putinit dhe po diskutojnë masa të reja. Disa zyrtarë amerikanë kërkojnë që Evropa të ndërmarrë “hapin tjetër të madh” kundër Rusisë.
Ndërkohë, Kievi ka propozuar përjashtimin e plotë të bankave ruse nga sistemi i dollarit, megjithëse nuk dihet nëse kjo do të pranohet.
Në Kongres, po ringjallet një projektligj dypartiak për sanksione shtesë ndaj Rusisë, që Trump pritet ta mbështesë, por jo menjëherë.
Nga Moska, një i dërguar i Putinit ka deklaruar se palët janë afër një zgjidhjeje diplomatike, ndërsa Ukraina e mirëpret mundësinë e sanksioneve të reja si mënyrën më efektive për të “çmontuar makinerinë luftarake ruse”.
