Organizata për të drejtat civile dhe të emigrantëve kanë bërë thirrje për protesta në mbarë Shtetet e Bashkuara këtë fundjavë, pas vrasjes së një aktivisteje në Minnesota nga një agjent i Shërbimit Amerikan të Emigracionit dhe Doganave (ICE). Ndërkohë, autoritetet shtetërore kanë nisur një hetim të veçantë për ngjarjen, paralel me atë federal.
Minneapolis u shndërrua në epiqendrën e tensioneve të mërkurën, kur një oficer i ICE qëlloi për vdekje 37-vjeçaren Renee Good, nënë e tre fëmijëve, ndërsa ajo ndodhej në makinën e saj në një rrugë rezidenciale. Ngjarja ndodhi pak ditë pasi rreth 2 mijë agjentë federalë u dislokuan në qytet, në atë që Departamenti i Sigurisë Kombëtare e quajti “operacioni më i madh ndonjëherë”.
Guvernatori i Minnesotës, Tim Walz, e cilësoi dislokimin si “të pamatur” dhe një shembull të “qeverisjes në stil reality show”. Protestat u përshkallëzuan të premten mbrëma, kur qindra demonstrues organizuan një “protestë me zhurmë” pranë një hoteli ku dyshohet se po qëndronin agjentë të ICE. Policia shtetërore shpalli tubimin të paligjshëm dhe ndaloi përkohësisht dhjetëra persona.
Ngjarja ka prodhuar narrativa të kundërta. Administrata e Donald Trump pretendon se Renee Good po “pengonte” dhe “përndiqte” agjentët dhe se oficeri hapi zjarr në vetëmbrojtje, duke e cilësuar incidentin si “akt terrorizmi të brendshëm”. Por kryebashkiaku i Minneapolis-it, Jacob Frey, tha se pamjet filmike nga qytetarët e pranishëm rrëzojnë versionin zyrtar, ndërsa organizatat për të drejtat civile theksojnë se nuk kishte asnjë justifikim për përdorimin e forcës vdekjeprurëse.
Pamjet tregojnë se makina e Good po largohej nga agjentët kur u qëllua, duke vënë në dyshim pretendimin se ajo kishte tentuar të përplaste oficerin. Për shkak të tensioneve, guvernatori Walz ka vendosur Gardën Kombëtare në gatishmëri.
Incidenti në Minneapolis, së bashku me një tjetër rast të ngjashëm në Portland, ka nxitur mijëra protestues në disa qytete amerikane. Mbi 1 mijë tubime janë planifikuar nën sloganin “ICE Out For Good”, duke e kthyer çështjen e deportimeve të militarizuara në një krizë të re politike dhe shoqërore për SHBA-në, në prag të përballjeve të ashpra mes autoriteteve federale dhe atyre shtetërore.
