Shtetet e Bashkuara thanë se do t’i revokojnë vizën presidentit kolumbian Gustavo Petro pasi ai doli në rrugët e Nju Jorkut të premten në një demonstratë pro-palestineze dhe u bëri thirrje ushtarëve amerikanë të mos zbatojnë urdhrat e presidentit Donald Trump.
“Do të revokojmë vizën e Petros për shkak të veprimeve të tij të pamatura dhe nxitëse,” shkroi Departamenti i Shtetit në X.
Petro, duke folur përpara një turme protestuesish pro-palestinezë jashtë selisë së OKB-së në Manhattan, bëri thirrje për një forcë të armatosur globale me prioritet çlirimin e palestinezëve, duke shtuar: “Kjo forcë duhet të jetë më e madhe se ajo e Shteteve të Bashkuara.”
“Prandaj nga këtu, nga Nju Jorku, u kërkoj të gjithë ushtarëve të ushtrisë së Shteteve të Bashkuara të mos drejtojnë armët ndaj njerëzve. Mos binduni ndaj urdhrave të Trump-it. Binduni ndaj urdhrave të njerëzimit,” tha Petro në spanjisht.
Reuters nuk mundi të konfirmonte menjëherë nëse Petro ndodhej ende në Nju Jork. Zyra e tij dhe ministria e jashtme e Kolumbisë nuk iu përgjigjën menjëherë kërkesave për koment.
Përplasjet në OKB për luftën në Gaza
Administrata Trump ka ndërmarrë masa të ashpra ndaj zërave pro-palestinezë, ndërkohë që vende si Franca, Britania, Australia dhe Kanadaja kanë njohur një shtet palestinez – lëvizje që kanë zemëruar Izraelin dhe aleatin e tij, SHBA-në.
Petro, presidenti i parë i majtë i Kolumbisë dhe një kundërshtar i zëshëm i luftës së Izraelit në Gaza, e sulmoi Trump-in në fjalimin e tij në Asamblenë e Përgjithshme të OKB-së të martën, duke thënë se lideri amerikan ishte “bashkëfajtor në gjenocid” në Gaza dhe duke kërkuar “ndjekje penale” për sulmet me raketa të SHBA-së ndaj anijeve të dyshuara për trafik droge në Karaibe.
Kryeministri izraelit Benjamin Netanyahu, duke folur në Asamble të premten, dënoi vendet perëndimore që kanë përqafuar idenë e shtetësisë palestineze, duke i akuzuar ato se po dërgojnë mesazhin se “vrasja e hebrenjve shpërblehet”.
Izraeli filloi sulmin e tij mbi Gazën pas një sulmi të udhëhequr nga grupi militant palestinez Hamas më 7 tetor 2023, ku u vranë rreth 1.200 persona dhe 251 u morën peng. Që atëherë, fushata ushtarake e Izraelit në Gaza ka vrarë mbi 65.000 palestinezë, sipas autoriteteve shëndetësore të Gazës, dhe ka zhvendosur të gjithë popullsinë e enklavës së ngushtë.
Shumë ekspertë të të drejtave të njeriut thonë se kjo përbën gjenocid, akuzë që Izraeli e mohon me zemërim, duke thënë se lufta është vetëmbrojtje./ Reuters
