Shtetet e Bashkuara po dërgojnë një anije të madhe sulmuese amfibe me mijëra marinsa dhe marinarë shtesë drejt Lindjes së Mesme, ndërsa lufta me Iranin po hyn në javën e katërt dhe tensionet në rajon vazhdojnë të rriten.
Sipas tre zyrtarëve amerikanë që folën për Reuters, kjo lëvizje është pjesë e përpjekjeve të Uashingtonit për të përballuar situatën në rajon, veçanërisht pas bllokimit nga Irani të ngushticës strategjike të Hormuzit, një rrugë detare nga e cila kalon një pjesë e madhe e naftës së botës.
Çmimet e naftës janë rritur rreth 50% që nga fillimi i luftës mes SHBA-së, Izraelit dhe Iranit, ndërsa frika për një krizë të madhe energjetike globale po shtohet. Çmimi i naftës Brent është afruar me 110 dollarë për fuçi.
Vendimi për dërgimin e forcave shtesë erdhi ndërsa presidenti amerikan Donald Trump kritikoi ashpër aleatët e SHBA-së për refuzimin e ndihmës për hapjen e ngushticës së Hormuzit.
“Frikacakë, dhe ne do ta kujtojmë këtë!”, shkroi Trump në një reagim të ashpër në rrjetet sociale.
Ndërkohë, udhëheqësi i ri suprem i Iranit, Mujtaba Khamenei, në një mesazh për Vitin e Ri pers, deklaroi se sulmet ndaj liderëve iranianë nuk e kanë frikësuar vendin.
“Ata menduan se duke goditur liderin dhe figura të rëndësishme do të krijonin frikë, por kombi u përgjigj me unitet dhe rezistencë”, thuhet në mesazhin e tij.
Ndërsa vendet myslimane festojnë fundin e Ramazanit dhe në Iran shënohet viti i ri pers, perspektiva për një përfundim të shpejtë të luftës duket ende e largët.
