Shtetet e Bashkuara përdorën për të gjashtën herë veton në Këshillin e Sigurimit të OKB-së, duke penguar një projekt-rezolutë që kërkonte armëpushim të menjëhershëm dhe të përhershëm në Gaza si dhe lirimin e pengjeve.
Të 14 vendet e tjera anëtare votuan pro, duke e cilësuar situatën humanitare në Gaza si “katastrofike” dhe duke i bërë thirrje Izraelit të heqë kufizimet mbi ndihmën. Por SHBA tha se teksti nuk dënonte mjaftueshëm Hamasin dhe nuk njihte të drejtën e Izraelit për vetëmbrojtje.
Pas votimit, ambasadori palestinez në OKB, Riyad Mansour, e quajti vendimin “thellësisht të dhimbshëm”, ndërsa përfaqësuesit e Pakistanit dhe Algjerisë folën për një “moment të errët” dhe kërkuan falje publikisht nga populli palestinez.
Ndërkohë, në terren, situata në Gaza City po përshkruhet nga OKB si “apokaliptike”, me civilë që vazhdojnë të ikin nën bombardime dhe përparimin e tankeve izraelite. Që nga 7 tetori 2023, sipas Ministrisë së Shëndetësisë në Gaza, mbi 65 mijë persona janë vrarë, ndërsa qindra të tjerë kanë humbur jetën nga uria dhe mungesa e ushqimit.
Ky zhvillim ndodh pak ditë para Asamblesë së Përgjithshme të OKB-së, ku pritet që disa aleatë të ngushtë të SHBA-së, përfshirë Mbretërinë e Bashkuar, të njohin shtetin palestinez.
