Tensionet mes NATO-s dhe Rusisë kanë njohur një tjetër përshkallëzim këtë fundjavë. Dy avionë luftarakë gjermanë të tipit Eurofighter u ngritën urgjentisht të dielën nga baza ajrore Rostock-Laage, për të ndaluar një aeroplan ushtarak rus të tipit Il-20M, i cili kishte injoruar thirrjet për kontakt gjatë fluturimit mbi Detin Baltik.
Ky incident ndodhi vetëm pak ditë pas një tjetër provokimi, kur aeroplanë MiG-31 të forcave ajrore ruse shkelën hapësirën ajrore të Estonisë në zonën e Gjirit të Finlandës. Pas këtij episodi, autoritetet estoneze kërkuan mbledhjen e një seance urgjente të Këshillit të Sigurimit të Kombeve të Bashkuara, duke e cilësuar shkeljen si një provokim të drejtpërdrejtë dhe një “sjellje të pafytyrë” nga ana e Kremlinit.
Ministri i Jashtëm i Estonisë, Margus Tsahkna, deklaroi se kjo nuk është një ngjarje e izoluar, por pjesë e një modeli më të gjerë të agresionit rus në rajon, i cili ka përfshirë edhe shkelje të hapësirës ajrore të Polonisë dhe Rumanisë.
Reagimet ndërkombëtare nuk kanë munguar. Presidenti i Shteteve të Bashkuara të Amerikës, Donald Trump, i pyetur mbi angazhimin e SHBA-së për mbrojtjen e vendeve të Bashkimit Evropian në rast të një sulmi rus, u shpreh prerazi: “Po, do ta bëja. Do ta bëja.”
Ndërkohë, Estonia ka kërkuar një mbledhje konsultative nën nenin 4 të traktatit të NATO-s, i cili parashikon takime të menjëhershme mes aleatëve kur një vend anëtar e konsideron të rrezikuar sigurinë e tij. Ky zhvillim ka ngjallur reagime të forta në disa shtete evropiane. Letonia ka paralajmëruar për rrezikun real të një konflikti të mundshëm nëse Rusia vazhdon me provokimet e saj ndaj NATO-s, ndërsa presidenti i Çekisë, Petr Pavel, ka kërkuar një përgjigje të ashpër nga aleanca perëndimore, duke theksuar se çdo lloj dorëzimi ndaj agresionit rus është i papranueshëm.
Nga ana tjetër, Rusia ka akuzuar hapur Britaninë e Madhe, duke e cilësuar atë si një nga liderët e një “kampi pro-luftës” që, sipas Kremlinit, po ushtron presion mbi Moskën për të përshkallëzuar konfliktin.
Në sfondin e këtyre tensioneve të rritura, Presidenti i Ukrainës, Volodymyr Zelenskyy, ka shprehur gatishmërinë e tij për bisedime të drejtpërdrejta me Presidentin rus Vladimir Putin. Megjithatë, Kremlini ka lënë të kuptohet se negociatat mund të zhvillohen vetëm nëse adresohen “arsyet e thella” të luftës, duke përfshirë, sipas Moskës, edhe dorëzimin e Ukrainës.
