Takimi i paralajmëruar mes Donald Trump dhe Vladimir Putin në Budapest ka ndezur tensione të forta diplomatike në Europë. Kryeministri hungarez Viktor Orbán e cilësoi Hungarinë “vendi i vetëm në Europë ku mund të ndodhë një takim i tillë”, por zgjedhja e Budapestit paraqet pengesa serioze ligjore dhe praktike për presidentin rus.
Gjykata Ndërkombëtare Penale (ICC) ka lëshuar urdhërarrest për Putinin, çka do të thotë se çdo vend anëtar – përfshirë Hungarinë, Serbinë dhe Rumaninë – është i detyruar ta arrestojë nëse avioni i tij hyn në hapësirën e tyre ajrore. Kjo e bën pothuajse të pamundur që ai të udhëtojë drejt Budapestit pa kaluar mbi territor të NATO-s ose të një vendi që ka nënshkruar Statutin e Romës.
Ministria e Jashtme e Gjermanisë i ka bërë thirrje Hungarisë që ta arrestojë Putinin, ndërsa disa vende të tjera janë treguar më të kujdesshme, duke mos dashur të pengojnë një nismë që mund të shihet si përpjekje për paqe në Ukrainë.
Rrugët e mundshme të fluturimit për Putinin janë të kufizuara dhe të rrezikshme: kalimi mbi Ukrainë është i pamundur për shkak të luftës, ndërsa fluturimi përmes Polonisë – një prej aleatëve më të fortë të Kievit – do të ishte politikisht i papranueshëm dhe ushtarakisht i pasigurt. Si rrugë më e mundshme përmendet ajo që kalon nga Bjellorusia dhe Sllovakia, e cila së fundmi ka treguar qasje pro-Moskës.
Edhe pse avionët rusë janë ende të ndaluar të fluturojnë mbi hapësirën e BE-së, ministri i Jashtëm hungarez Péter Szijjártó ka deklaruar se “Hungaria do të sigurojë që presidenti Putin të hyjë në vend, të zhvillojë negociatat dhe të kthehet në shtëpi pa pengesa”, duke theksuar se vendi i tij “është sovran dhe nuk ka nevojë për asnjë konsultim me askënd”.
