Sekretari i Përgjithshëm i NATO-s, Mark Rutte, ka shprehur mbështetje për deklaratat e bëra këtë javë nga Presidenti i Shteteve të Bashkuara, Donald Trump, i cili kërkoi që vendet anëtare të Aleancës të jenë të gatshme të rrëzojnë dronët dhe avionët rusë nëse ata hyjnë në hapësirën ajrore të vendeve aleate. Në një intervistë për “Fox News”, Rutte u shpreh qartë se pajtohet plotësisht me qasjen e Presidentit amerikan.
“Nëse është e nevojshme. Pajtohem plotësisht me Presidentin Trump: nëse është e nevojshme”, tha ai, duke theksuar se ky është një veprim që mund të merret për mbrojtjen e sigurisë së hapësirës ajrore të NATO-s.
Sekretari i Përgjithshëm shtoi se ushtritë e vendeve anëtare janë të trajnuara posaçërisht për të vlerësuar kërcënime të tilla dhe për të marrë vendimet e duhura në situata konkrete. “Forcat tona të armatosura janë të përgatitura jo vetëm për të vlerësuar natyrën e kërcënimit, por edhe për të përcaktuar nëse është e mundur shoqërimi i avionëve rusë jashtë territorit aleat apo nëse duhet ndërmarrë një veprim më i vendosur”, deklaroi ai.
Rutte nënvizoi se mbrojtja e hapësirës ajrore të vendeve anëtare është një nga detyrimet themelore të NATO-s dhe se Aleanca është e bashkuar përballë çdo provokimi apo shkeljeje të mundshme të sovranitetit të saj ajror. Deklaratat e tij vijnë në një moment kur tensionet mes Perëndimit dhe Rusisë mbeten të larta, veçanërisht në sfondin e luftës në Ukrainë dhe incidenteve të përsëritura të shkeljeve të hapësirës ajrore në kufijtë lindorë të Aleancës.
