Rusia ka testuar me sukses raketën e re me motor bërthamor 9M730 “Burevestnik”, të aftë për të transportuar armë bërthamore, njoftoi Kremlini nëpërmjet një deklarate zyrtare. Lajmi u konfirmua nga gjenerali i lartë rus përpara Presidentit Vladimir Putin, i cili deklaroi se testet thelbësore të sistemit tashmë kanë përfunduar.
Sipas raportimeve të Reuters, raketa Burevestnik — e njohur nga NATO si SSC-X-9 Skyfall — udhëtoi rreth 14,000 kilometra dhe qëndroi në ajër për rreth 15 orë gjatë provës. Putin, i veshur me uniformë kamuflazhi, tha se raketa është “e pamposhtur ndaj çdo mbrojtjeje raketore aktuale dhe të ardhshme”, duke e cilësuar si një hap të rëndësishëm drejt vendosjes operative të saj.
“Burevestnik ka një rreze veprimi pothuajse të pakufizuar dhe ndjek një rrugë fluturimi të paparashikueshme, çka e bën të pamundur për çdo sistem mbrojtës ta ndalojë,” theksoi Putin gjatë takimit me Shefin e Shtabit të Përgjithshëm, Valery Gerasimov.
Kreu i Kremlinit shtoi se pas përfundimit të testeve, Rusia do të kalojë në fazën përfundimtare të zhvillimit, përpara se raketa të vendoset në arsenalin strategjik të vendit.
